Галштатска култура — археологична култура конця бронзовой добы и зачатку желѣзной добы (около X. – V. стороча до н. е.), памятникы котрой суть росширены на югу Середньой Европы.
Назва походить од околицѣ города Галштат (Австрия), де были найдены соляны копалнѣ и археологичне погребиско, объявлене в року 1846.
В том погребиску з первой половкы 1. тысячроча до н. е. выкопали веце тысяч бронзовых и желѣзных предметох. Желѣзны предметы, найдены въедно з бронзовыма доста ясно указовали первоначалность, примитивну выробу, што археологох привело на тото заключѣня, обы зачаток желѣзной добы в Европѣ брали од Галштатскых находок.
Носителями галштатской културы были Илиры и Келты. Про тоту културу суть характерны слабо укрѣплены осады, спальованя мертвых в тѣлопалнях и погребѣня в попелниках.